Home திருக்குறள் அதிகாரங்கள் பொருட்பால் அதிகாரம் 49: காலமறிதல்

பொருட்பால் (Wealth) இயல்: அரசியல் (Royalty) அதிகாரம் 49 / 133

காலமறிதல் Knowing the fitting Time (Chapter 49)

இவ்வதிகாரத்தில் குறள் 481 முதல் 490 வரையிலான 10 திருக்குறள்கள், 3 விளக்க உரைகள் மற்றும் படங்களுடன் தொகுக்கப்பட்டுள்ளன.

📖

வேறு அதிகாரம் தேர்வு செய்க:

குறள் எண்: #481 அதிகாரம் வரிசை: 1 / 10

பகல்வெல்லும் கூகையைக் காக்கை இகல்வெல்லும்
வேந்தர்க்கு வேண்டும் பொழுது.

"A crow will conquer owl in broad daylight; The king that foes would crush, needs fitting time to fight"

மு.வ உரை: காக்கை தன்னைவிட வலிய கோட்டானைப் பகலில் வென்றுவிடும், அதுபோல் பகையை வெல்லக்கருதும் அரசர்க்கும் அதற்கு ஏற்ற காலம் வேண்டும்.

சாலமன் பாப்பையா: தன்னைவிடப் பலமுள்ள கோட்டானைக் காக்கை பகலில் வென்றுவிடும்; ஆகவே பகைவரை வெல்ல எண்ணுபவர்க்கு அதற்கு ஏற்ற காலம் அவசியம்.

முழு உரைகள் காண்க

குறள் எண்: #482 அதிகாரம் வரிசை: 2 / 10

பருவத்தோடு ஒட்ட ஒழுகல் திருவினைத்
தீராமை ஆர்க்குங் கயிறு.

"The bond binds fortune fast is ordered effort made, Strictly observant still of favouring season's aid"

மு.வ உரை: காலத்தோடுப் பொருந்துமாறு ஆராய்ந்து நடத்தல் ( நில்லாத இயல்பு உடைய) செல்வத்தை நீங்காமல் நிற்குமாறு கட்டும் கயிறாகும்.

சாலமன் பாப்பையா: காலந் தவறாமல் காரியம் ஆற்றுவது, ஓடும் செல்வத்தை ஓடாமல் கட்டும் கயிறு ஆகும்.

முழு உரைகள் காண்க

குறள் எண்: #483 அதிகாரம் வரிசை: 3 / 10

அருவினை யென்ப உளவோ கருவியான்
காலம் அற஧ந்து செயின்.

"Can any work be hard in very fact, If men use fitting means in timely act"

மு.வ உரை: (செய்யும் செயலை முடிப்பதற்கு வேண்டிய) கருவிகளுடன் ஏற்றக் காலத்தையும் அறிந்து செய்தால் அரிய செயல்கள் என்பது உண்டோ.

சாலமன் பாப்பையா: செயலைச் செய்து முடிப்பதற்கு ஏற்ற திறமைகளுடனும் தந்திரங்களுடனும், உரிய காலத்தைக் கண்டு ஒரு செயலைச் செய்தால் செய்வதற்கு அரிய செயல் என்று ஏதேனும் உண்டா?

முழு உரைகள் காண்க

குறள் எண்: #484 அதிகாரம் வரிசை: 4 / 10

ஞாலம் கருதினுங் கைகூடுங் காலம்
கருதி இடத்தாற் செயின்.

"The pendant world's dominion may be won, In fitting time and place by action done"

மு.வ உரை: (செயலை முடிப்பதற்கு ஏற்ற) காலத்தை அறிந்து இடத்தோடு பொருந்துமாறு செய்தால், உலகமே வேண்டும் எனக் கருதினாலும் கைகூடும்.

சாலமன் பாப்பையா: ஏற்ற காலத்தையும் இடத்தையும் அறிந்து ஒரு செயலைச் செய்தால், பூவுலகம் முழுமையையும் வேண்டினாலும் அது கைவசப்படும்.

முழு உரைகள் காண்க

குறள் எண்: #485 அதிகாரம் வரிசை: 5 / 10

காலம் கருதி இருப்பர் கலங்காது
ஞாலம் கருது பவர்.

"Who think the pendant world itself to subjugate, With mind unruffled for the fitting time must wait"

மு.வ உரை: உலகத்தைக் கொள்ளக் கருதிகின்றவர் அதைப்பற்றி எண்ணிக் கலங்காமல் அதற்கு ஏற்ற காலத்தைக் கருதிக்கொண்டு பொறுத்திருப்பர்.

சாலமன் பாப்பையா: பூவுலகம் முழுவதும் வேண்டும் என்போர், ஏற்ற காலத்தை எண்ணித் தவறாமல் காத்து இருப்பர்.

முழு உரைகள் காண்க

குறள் எண்: #486 அதிகாரம் வரிசை: 6 / 10

ஊக்க முடையான் ஒடுக்கம் பொருதகர்
தாக்கற்குப் பேருந் தகைத்து.

"The men of mighty power their hidden energies repress, As fighting ram recoils to rush on foe with heavier stress"

மு.வ உரை: ஊக்கம் மிகுந்தவன் (காலத்தை எதிர்பார்த்து) அடங்கியிருத்தல் போர் செய்யும் ஆட்டுக்கடா தன் பகையைத் தாக்குவதற்க்காகப் பின்னே கால் வாங்குதலைப் போன்றது.

சாலமன் பாப்பையா: ஏற்ற காலம் பார்த்து ஆற்றல் மிக்கவன் காத்திருப்பது சண்டையிடும் ஆட்டுக்கடா, தன் பகைமீது பாய்வதற்காகப் பின்வாங்குவது போன்றதாகும்.

முழு உரைகள் காண்க

குறள் எண்: #487 அதிகாரம் வரிசை: 7 / 10

பொள்ளென ஆங்கே புறம்வேரார் காலம்பார்த்து
உள்வேர்ப்பர் ஒள்ளி யவர்.

"The glorious once of wrath enkindled make no outward show, At once; they bide their time, while hidden fires within them glow"

மு.வ உரை: அறிவுடையவர் ( பகைவர் தீங்கு செய்த) அப்பொழுதே உடனே புறத்தில் சினம் கொள்ளமாட்டார், (வெல்வதற்கு ஏற்ற) காலம் பார்த்து அகத்தில் சினம் கொள்வார்.

சாலமன் பாப்பையா: தம்பகைவர் அடாது செய்தால் அவர் அறியத் தம் பகைமையை அறிவுடையவர், விரைந்து வெளியே காட்டமாட்டார், ஆனால், ஏற்ற காலம் நோக்கிச் சினத்தை மனத்திற்குள் வைத்திருப்பர்.

முழு உரைகள் காண்க

குறள் எண்: #488 அதிகாரம் வரிசை: 8 / 10

செறுநரைக் காணின் சுமக்க இறுவரை
காணின் கிழக்காம் தலை.

"If foes' detested form they see, with patience let them bear; When fateful hour at last they spy,- the head lies there"

மு.வ உரை: பகைவரைக் கண்டால் பொறுத்துச் செல்லவேண்டும், அப் பகைவர்க்கு முடிவுகாலம் வந்த போது அவருடைய தலை கீழே விழும்.

சாலமன் பாப்பையா: பகைவர்க்கு அழிவுகாலம் வரும்வரை அவரைக் கண்டால் பணிக; அழிவுகாலம் வரும்போது தடை இன்றி அழிந்தபோவர்.

முழு உரைகள் காண்க

குறள் எண்: #489 அதிகாரம் வரிசை: 9 / 10

எய்தற் கரியது இயைந்தக்கால் அந்நிலையே
செய்தற் கரிய செயல்.

"When hardest gain of opportunity at last is won, With promptitude let hardest deed be done"

மு.வ உரை: கிடைத்தற்கறிய காலம் வந்து வாய்க்குமானால், அந்த வாய்ப்பைப் பயன்படுத்திக் கொண்டு அப்போதே செய்தற்கரியச் செயல்களைச் செய்ய வேண்டும்.

சாலமன் பாப்பையா: அடைவதற்கு அரியதை அடைவதற்கு ஏற்ற காலம் வந்து விட்டால் அப்பொழுதே தான் செய்வதற்கு அரிய செயல்களைச் செய்து கொள்க.

முழு உரைகள் காண்க

குறள் எண்: #490 அதிகாரம் வரிசை: 10 / 10

கொக்கொக்க கூம்பும் பருவத்து மற்றதன்
குத்தொக்க சீர்த்த இடத்து.

"As heron stands with folded wing, so wait in waiting hour; As heron snaps its prey, when fortune smiles, put forth your power"

மு.வ உரை: பொறுத்திருக்கும் காலத்தில் கொக்குப் போல் அமைதியாக இருக்க வேண்டும், காலம் வாய்த்த போது அதன் குத்து போல் தவறாமல் செய்து முடிக்க வேண்டும்.

சாலமன் பாப்பையா: ஒடுங்கி இருக்க வேண்டிய நேரத்தில் கொக்கைப் போல் ஒடுங்கிக் காத்து இரு. செயற்படும் நேரம் வந்தபோது கொக்கு தவறாமல் தன் இரையைக் குத்திப் பிடிப்பதுபோல் பிழையின்றிச் செய்து முடி.

முழு உரைகள் காண்க